"Herbst-DiKo in Simbach"

Am 09.10.2009 wa's moi wieda so weid, s'DiKo-Wochnende is voa da Dia gstandn.
Zerst sama olle gmiadle okemma und nochm Abndessn hama mid da Konferenz ogfangd. Mia wan mid de Gäste ca. 16 Teilnehma; da unsa allseits beliebter Diözesanpräses Peter Meister leida ned anwesend sei hod kinna san de geistlichn Impulse vo da Teresa gmacht woan.
Mia hama einige neie Sachan ghead, zum Beispiel hod X-Mag iatz a Internetseitn, wo ma ois nochlesn konn, wos in da letztn Zeidung gstandn hod. Dann hama no üba "Jugend und Arbeitswelt" diskutiert und an neia Arbeitskreis, "Eine Welt", beschlossn. Aussadem hama no d'Einladung zua "Bayernradltour" griagd. Tja, ansonsdn hama no auf "Wegweisend" zruckgschaud, wobei des Fazit wa, "es wa super sche, trotz fuachba stikiga Turnhalle".
Nochdem ois geklärt, vozäid und ausdiskutiert wa sama no gmiadle beianand gsesn, de letztn san dann um hoibe viare ins Bett ganga. Wa'n aba am nächsdn Dog trotzdem erstaunle frisch, obwoi ma scho um hoibe neine beim Frühstück wa'n.

Kuaz nochm Frühstück in na Pause is duach Bonbonlos entschiedn woan wea an Bericht schreim muass. Da noch hama dann Reise nach Jerusalem gspuid und jeda dea ausgschiedn is, hod in da Küch in 30 Sekundn zwoa Kochutensilien suacha miassn und mia hand in Gruppn A und B eiteilt woan.
Nochdem olle zwoa Sachan und a Gruppn ghobt ham sama olle in da Kanapeeckn gsessn und hama a Aufstellung gmacht, wea in wos füa a Gruppn kemma is und wos de füa Utensilien ham. Jede Gruppn hod de Sachan heanemma deafa, de sie gsammlt ghobt hod und de no in da Küch do gwen san. De Utensilien vo da andan Gruppn wa'n Tabu. Dann hob i an Buagstam song deafa und hon C gnumma, duach des wa entschiedn, dass de Gruppn in dea i wa d'Nachspeise machd. Und de anda d'Vorspeise, Hauptgericht hod jede Gruppe gmacht.

Pro Person, de beim Abendessen do san, des san 13 gwen, hod jede Gruppn anfangs 1,50€ zua Verfügung ghobt. Doch mia hama no dreimoi knobln deafa und für jedsmoi gwinna hod ma 0,25€ dazua griagd pro Person. Außadem hama no darum knobld, wea ois ersts an Ofa deaf, fois ma bei-de s'Backrohr braucha dadn.

Dann gings ans Grichta aussuacha und kurz voa Mittag dann no zu a wildn Einkaufstour, bei dea Team A midm Rezeptbuach und mit Paparazzi (Simone) unterwegs war. Nach der Einkaufstour gings füa B noch schnell auf Besorgungsfahrt, da de vom Jugendhaus z'groaß wa'n.

Nochdem olle wieda do wa'n hods super guade Spagetti mid Bolognese- und Käsesoße gem. Dann hod da Raphi leida fohn miassn, somit wa'n Team A grod no drei Leid.
Ois d'Küch dann wieda einigamaßn sauba wa gings auf zua Küchnschlacht. Z'erst is Gruppe A eine und hod ia Bayrische Creme und d'Rote Grütze gmacht, d'Creme hams in Tassn gfüllt und dann in Kühlschrank gstäid.
Dann is des anda Team eine und hod mid eanare Sachan ogfang, während Gruppe A Kaffeepause gmacht hod. Noch dea Pause san dann siem Leid in da Küch gwen, weil beide Teams am wergln wa'n.
Um Punkt 18.00 Uhr is dann ans serviern ganga.

Während da Wartezeit zwischn de zwoa Hauptgerichte hod unsa Diözesan Präses Peter Meister a Vorlesestund ghabt.
Bewertet hod jeda jede Gruppn allerdings nua d'Hauptspeise. Zwischn de Hauptgerichte und da Nachspeise ham einige im Regn an Abendspaziergang gmacht, weils so voi wa'n, dass nix mea obe brocht ham.
Nochdem dann jeda sei Nachspeise gessn ghobt hod, hama "grossa Preis" gspuid, mid lauda Kategorien rund ums Kocha, Essn und d'Tischmanieren. Do hama uns einfach iwie in Gruppn (1 und 2) eiteilt ghobt, und s'Team 1 hod dann schlussendle gwunna.
Kaum dass des spui goa wa hod unsa DL verkündet, weas Kochduell gwunna hod. Und wos glaubts, wea hod gwunna?? Tja, wos soi i song, Team A hod gwunna.
Doch s'Gwinna wa füa uns ned wichtig, sondern einfach des zammad kocha und aufd Nochd imma des zamsitzn. Am Samsdog aufd Nocht hods dann no pseudo Caipirinhas gem, de wa'n super guad.

Am Sonndog hama dann von da Teresa mid am Frühstück am Bett übaracht woan. Wia wa'n olle dodal baff. Noch und noch sama dann langsam aufgstandn und ham im Speisesaal no ausfürlich gfrühstückt, bevors dann ans Auframa ganga is.
Zwischn drin hama dann no im Meditationsraum an gloana Wortgottesdienst oda wias Teresa bezeichned hod a gloane Auszeit, nach dea ma dann no Reflektion gmacht und oa Rundn "Tote Fische" gspuid ham.
Des letzte wos ma do ham wa aufd Haushälterin zum woadn, ob ois zu iara Zufriednheit zamgramd is und dann sama olle vo am super Wochnende hoam gfohn.

von Karin Wenninger